«La vieya del Carbayón»

La tradición de “Partir la Vieya” baxo l’árbol tutelar de la ciudá ye parte del llabor etnográfico de l’Asociación Mazcaritos d’Uviéu pa recuperar l’Antroxu tradicional. Nel Miércoles de Ceniza empecipiaba la Cuaresma, cuarenta díes d’ayunu y astinencia, que nun se podía comer carne, nin facer música o danza. Les clases pudientes pagaben la Bula de la Santa Cruzada y celebraben el Domingu de Piñata, pero la xente probe tenía un Día la Vieya, pa “Partir la Cuaresma” cristiana con una folixa de tradición pagana.

La noticia atopémosla va 160 años nel “El Faro Asturiano” de marzu de 1865, cuando tovía taba en pie’l míticu Carbayón, valtáu en 1879 p’abrir la cai Uría. Constantino Cabal cita la tradición, viva nel Uviéu del XIX, d’una Vieya que salía de nueche del Campo San Francisco hasta’l Carbayón, poníase a parir embaxo l’arbolón y españaba con una traca qu’asustaba a los neños. Consolábenlos les madres que-yos dicíen que nun tovieren miéu, que partiera la Vieya y dexára-yos dulces embaxo la fueya.

La tradición ye una Vieya Cuaresmera, como la Vieya del Monte lleonesa, la Caileach celta o l’Anna Perenna romana. La Vieya del Carbayón recuérdala Luis Argüelles, etnógrafu y primer director del Pueblu d’Asturies, n’El Comercio de 1989: “Cuando La Vieya se partía en Oviedo bajo el “Carbayón”, incluyendo una copla: “Partióse la Vieya / que diba tranquiella;/ la Vieya partióse/ baxu’l Carbayón/ Partióse la Vieya/ fízose cerella/ con esto acabóse/ el xixilistrón”.

La Vieya del Carbayón: La Comparsa de Mazcaritos sal del Campo San Francisco cola xigantona de La Vieya, un cortexu de muyeres y la música de zanfona. Va de la Fuente del Caracol al carbayu más vieyu del Campo, fai homenaxe al Carbayón na placa la cai Uría y ponse de partu baxo l’árbol de la Plaza del Carbayón, con piñata pa los críos. Asina recordamos una tradición ancestral, partiendo la Cuaresma con respetu al Xardín Hestóricu del Campo y a la memoria del Carbayón que-y dio nome a la ciudá.