El Circuitu d’Esperiencies Culturales Insólites d’Uviéu, LINK, que se va celebrar del 28 al 30 d’agostu na antigua fábrica d’armes de La Vega, va sirvir nesta edición para esquizar la memoria, la vixilancia y l’impactu de la tecnoloxía. Ente les propuestes atópense una escultura que convierte 48 tablones de madera nuna estructura aparentemente ingrávida; una intelixencia artificial que borra’l píxel que representa a la Tierra; una nube virtual que percuerre les muertes d’espacios industriales sumíos y esperiencies inmersivas qu’enceten la vixilancia, la precariedá o’l folclore islandés.
Nesi sentíu, la programación braniza de la Fundación Municipal de Cultura d’Uviéu vuelve acutar un espaciu destacáu pa los llinguaxes artísticos más vanguardistas con siete trabayos procedentes de Francia, Taiwán, España, Bélxica, Luxemburgu, Países Baxos ya Islandia. Según informó’l Conceyu al traviés d’una nota de prensa, LINK va axuntar trés instalaciones artístiques y cuatro esperiencies de realidá estendida roblaes por ceadores consolidaos y nuevos talentos del arte dixital.
Coles mesmes, destacaron, la celebración de LINK en La Vega refuerza «el so venceyu cola candidatura d’Uviéu a Capital Europea de la Cultura 2031». L’antigua cortil fabril, exa central del proyectu Uviéu 2031, volverá tresformase mientres trés díes nun espaciu abiertu a la esperimentación artística, la innovación y el diálogu ente’l patrimoniu industrial, la creación contemporanea y la ciudadanía.
Primer película realizada en realidá virtual. Ente los nomes d’esta edición destaquen l’artista taiwanés Hsin-Chien Huang, pioneru de la realidá virtual, y el icónico músicu y compositor francés Jean-Michel Jarre, que presenten conjuntamente ‘The Eye and I’. Tamién forma parte del programa ‘A Long Goodbye’, de Kate Voet y Victor Maes, premiáu en Venecia; la primer película islandesa realizada en realidá virtual, ‘Fallax’; y la nueva instalación del colectivu francés Collectif Scale.
La ceadora avilesina Alba Matilla, Premio Asturies Nueva d’Artes Plástiques en 2024, va ser la encargada d’apurrir la presencia asturiana a la programación con ‘Alfabetos de destrucción’, una instalación interactiva y testil que recupera la memoria de los paisaxes obreros ya industriales.
