Categoría: Fiestes
Llega la Nueche d’Ánimes
La nueche del 31 d’ochobre ye la Nueche d’Ánimes. Una xornada mui prestosa enraigonada nes nueses tradiciones, lloñe del actual Halloween.
¿Qué se celebra? L’añu nuevu celta; el pasu del branu al iviernu, cuando la escuridá gana a la lluz. Trátase d’una fiesta de transición y d’apertura al otru mundu.
¿Cuándo ye? La nueche del 31 d’ochobre. Los pueblos celtes consideraben que por esta fecha los espíritus de los muertos tornaben al mundu de los mortales.
¿Vienen a facer daqué malo? Non. Pue haber espíritus malos, a los que se-yos alloña con una serie de rituales, pero en realidá ye una xornada na que comunicar colos familiares y xente querido finada.
¿Qué rituales se faen? Tradicionalmente, dexábase comida y agua fuera de les cases pa los difuntos, a los que se-yos atrayía mediante la lluz. Pa ello, nun primer momentu, agüecábense nabos pa meter fueu o veles nel so interior, anque llueu tamién se facía con calabaces. Gracies a estes aiciones, los difuntos saben llegar a les sos cases al mesmu tiempu que se protexe a la vivienda de los malos espíritus.
¿Estes tradiciones caltiénense n’Asturies? Sí, anque nes ciudaes grandes tán mui contaminaes pola festividá de Halloween, de moda gracies al cine y la televisión. En dalgunos pueblos asturianos tovía se pueden ver calabaces nesta nueche allumando la puerta de les cases y los cruces de camín.
Pero, ¿ye lo mesmo Samhain que Halloween? En realidá celebren lo mesmo, anque de diferente forma. El Halloween que conocemos ye la evolución que vivió l’añu nuevu celta nos Estaos Xuníos por mor de la emigración irlandesa. Al paecer, el so nome vien de ‘all hallow’s even’, vixilia de Tolos Santos, que camudó col pasu del tiempu a Halloween. Como de xuru yá conoces, los neños y neñes disfrácense de personaxes de terror y van peles cases pidiendo dulces. Esto último tamién lo facíen los rapacinos y rapacines asturianes, anque’l refugu de la Ilesia finó con esta tradición.
¿Y Tolos Santos? Como pasó con otres munches celebraciones paganes, como colos solsticios, lo que fixo la Ilesia católica foi adaptaes al so gustu. Asina, Samhain o la Nueche de los Difuntos, como se conoz n’Asturies, pasó a la modernidá como la viéspora del Día de Tolos Santos, que se celebra’l 1 de payares. Nél se rinde cultu a los santos, anque la población, por cuenta de la tradición, tamién lo fai a los difuntos. Asina, anguaño nesti día ye habitual visitar los cementerios y poner una vela en casa. ¿Vos suena esto último?
¿Cómo se celebra esta fecha nel restu del mundu? La celebración de Samhain ye asemeyada nos países de raigañu celta, anque Éire quiciabes ye’l país nel que meyor se conserva la tradición. Ellí faense grandes fogueres p’alloñar a los malos espíritus y la xente vive con muncha intensidá esti cambiu de ciclu. Dientro del Estáu, Galicia ye’l territoriu onde más fuercia caltién esta celebración. México, col Día de los Muertos, tamién tien espaciu nesta fecha, anque nesti casu, la tradición ye d’orixe mesoamericanu y non celta, y hasta la llegada de los conquistadores tenía llugar a primeros d’agostu, coincidiendo col novenu mes del calendariu solar mexica.
¿Cómo puedo celebrala yo? Afuraca cola ayuda de la to familia una calabaza pa meter dientro una vela y déxala fuera de casa con dalgo de comida y agua. De xuru que los tos seres queríos que yá nun tan con nós van agradecételo.
La vendimia de Cangas sigue recuperándose y llogra la meyor collecha en cuatro años
Los bodegueros de la Denominación d’Orixe recueyen 115.000 quilos d’uva de bona calidá, magar los hongos y los ataques de la fauna.
El balance de la vendimia dexó prestu nes bodegues de la Denominación d’Orixe Protexida (*DOP) vieno de Cangas, que recoyeron 115.000 quilos d’uva. Una cifra que supon la meyor collecha en cuatro años, doblar la llograda en 2018 y amontar la producción más d’un 30 per cientu con respectu al añu pasáu. Cumplióse, amás, l’oxetivu que se marcaren los miembros del sellu protexíu, que yera superar los 100.000 quilos d’uva.
La vendimia d’anguaño foi más temprana de lo que vien siendo habitual, adelantrándose unos 20 díes en comparanza con campañes anteriores. Como siempres, la recoyida empecipió n´Ibias, la segunda selmana de setiembre, pero a los pocos díes yá daba empiezu tamién en Cangas. Esti adelantu de la vendimia foi favorecíu pel branu secu que se vivió.
Sigue leyendo «La vendimia de Cangas sigue recuperándose y llogra la meyor collecha en cuatro años»
Fiesta de L´Amuravela (Cuideiru)
La fiesta de L’Amuravela ye una fiesta que se celebra na localidá asturiana de Cuideiru tolos años el 29 de xunu, festividá de San Pedro, patrón del pueblu. Mientres cuatro díes celebra les festividaes de San Pedro, San Pablo y San Pablín.
Pero si realmente queréis oyer una bona amuesa del asturlleonés del baxu Nalón podéis averavos el día de San Pedro (29 de xunu) a la multitudinaria fiesta de L’Amuravela, declarada Bien d’Interés Turísticu Nacional en 1979, un sermón laicu cargáu de rima y suspicacia que resume lo socedío nel añu.
Güei ye la “Nueche de San Xuan”
La nueche de San Juan o San Xuan ye muncho más qu’una onomástica n’Asturies, ye una nueche única, especial y máxica que’l so orixe ta envolubráu en misteriu, y ye d’ende onde surde ese halo de maxa que s’entemez col golor a fumu de les fogueres que se prenden cada 23 de xunu a lo llargo de tola xeografía asturiana. Rescata del fondu de cada unu de los asturianos esa esencia celta que cuerre poles nueses venes.
Esta nueche máxica ye para celebrar la nuesa cultura y la nuesa tradición onde tien de sonar la música asturiana, xiblar les gaites y resonar los tambores alredor de la foguera.