Publicado en Día de..., Fiestes

Güei ye la “Nueche de San Xuan”

La nueche de San Juan o San Xuan  ye muncho más qu’una onomástica n’Asturies, ye una nueche única, especial y máxica que’l so orixe ta envolubráu en misteriu, y ye d’ende onde surde ese halo de maxa que s’entemez col golor a fumu de les fogueres que se prenden cada 23 de xunu a lo llargo de tola xeografía asturiana. Rescata del fondu de cada unu de los asturianos esa esencia celta que cuerre poles nueses venes.

Esta nueche máxica ye para celebrar la nuesa cultura y la nuesa tradición onde tien de sonar la música asturiana, xiblar les gaites y resonar los tambores alredor de la foguera.

L’orixe d’esta celebración tien enforma de misteriu, y ye ende onde quiciabes surde ese halo de maxa que s’entemez col golor a fumu de les fogueres que pueblen cada pequenu núcleu habitáu d’Asturies cuando la lluz de cada 23 de xunu va llegando al so fin para da-y la bienvenida a la nueche.

Diz quiciabes la tradición más lliteraria qu’esta nueche ye la celebración d’un amor; el del sol a la tierra; que nesta nueche aguantase a abandonala dando llugar a la nueche más curtia del añu (asina se creía va sieglos primero que se precisara’l solsticiu de branu al 21 de xunu). N’honor a esti amor álcense fogueres qu’empiecen a amburar xusto a la fin d’ese 23 de xunu, cuando’l día llanza’l so últimu aliendu y naz con tola so fuerza’l nuevu.

Munches otres tradiciones fuéronse xuniendo a esti ritu paganu: los bailles alredor de la foguera, los baños en ríos y nel mar para tener salú mientres l’añu, el llanzar deseos a la foguera por que se cumplan o usar les sos llapaes y la fuerza purificador del fueu para quemar lo malo.

Tamién tien la so aguada cristiana la celebración; y ye que nesti casu atribúyese la fecha a la nacencia de San Juan Bautista, y la tradición de les fogueres a la qu’encendería’l so padre Zacarías para celebrar l’allumamientu.

Sía como fora y cual quiera que sía’l so orixe, n’Asturies estes feches son un momentu de celebración de la nuesa cultura y de la nuesa tradición; espaciu reserváu por que suene la música asturiana, por que xiblen les gaites y truenen los tambores. Una fiesta na que la sidra conviertese nel mestranzu máxicu, na que los sabores de la nuesa tierra para compartir nun mantel sirven para esconxurar a trasgos, xianas y tolos seres mitolóxicos de la nuesa cultura.

RESUME:

¿Qué ye la Nueche de San Xuan? Ye una celebración que tien raigaños celtes, que recibía’l nome d’Alban Heruin, y na que se fai cultu al sol y al agua. Trátase d’una nueche máxica pa munches cultures, ente elles l’asturiana.

¿Qué se celebra? El solsticiu de branu, esto ye, cuando’l sol ta nel so puntu más altu, lo que fai qu’esta xornada sía la nueche más curtia del añu; el día con más lluz.

¿Cuándo ye? La nueche del 23 de xunu, anque’l solsticiu de branu en verdá ye’l 20 de xunu. La razón d’esti cambiu foi la decisión de la Ilesia católica d’adaptar la folixa a San Xuan Bautista.

¿Qué rituales se faen? Nesta xornada faense fogueres cola intención de dar más fuercia al sol. N’Asturies, éstes suelen asitiase cerca de puntos d’agua, como fontes o ríos, cola fin de purificar. Asina, la xente suel baillar alredor de la foguera y engalana les fontes nesti día. Tamién ye habitual que se bañe nel mar, fontes o ríos pa tener salú.

¿Por qué ye máxica esta nueche? La tradición asturiana atribúi a la Nueche de San Xuan aspeutos máxicos. Por exemplo, esta nueche salen de les sos cueves les xanes, muyeres de muncha belleza y llarga cabellera rubia a les que se pue ver nes fontes esti día. Éstes poseen importantes ayalgues a la que podrán acceder quién consiga desencantales. Tamién ye posible ver la flor d’agua, que naz per un instante colos primeros rayos de la mañana. Ésta trae amor, belleza y salú.

Plaza Catedral d´Uviéu

Dalgunos refranes:

L’orbayu per San Xuan quita’l vinu y nun da pan.
Quien nun salló per San Xuan, da muestres de folgazán.
Dende San Xuan a San Pedru van cinco díes y mediu.
El día de San Xuan, quiebra la pata’l pan y el día de Santa Marina, da-y cola focina.
El día de San Xuan, salen les xanes a bailar.
El que cueya arestín la mañana de San Xuan, nun lu pica la culiebra nin nengún otru animal.
El que quiera bon pollu y bona gallina, que los eche en San Xuan y los saque per Santa Marina.
En San Xuan, al sol quema’l pan.
Per San Xuan, tanto queixu como pan.
Per San Xuan, la sardina mueya’l pan.
Per San Xuan, marcha’l cuquieḷḷu y vien el tabán.
Per San Xuan, nun quites el gabán.
Per san Xuan, seca la raíz el pan, per San Pedro raíz y tuero.
Per San Xuan too ye pan, y pela Madalena, pan y avena.
Per San Xuan, vienen los maquetos, per San Xuan vienen y se van.
Per San Xuan, ablana en pan; pela Madalena, ablana llena y per San Roque, se recoge.
Per San Xuan, ayos al desván.
Per San Xuan, quemó la vieya’l telar.
Per San Xuan, quiebra’l primer frutal, per San Pedru’l del mediu, y per Santa Sabel vamos a él.
Rellampaos per San Xuan, castañes los pagarán.
San Xuan de les uves, qué tarde vienes y qué poco dures.
San Xuan de venida, primavera dida.
Si llueve per San Xuan, encama’l pan.
Si vas a San Xuan, lleva pan, qu’ellí nun te lo dan.

Puedes conocer más refranes asturianos y el so significáu nesti llibru de Xulio Viejo.

Autor:

Maestra de Llingua Asturiana Colexu Carmen Ruiz-Tilve - Uviéu