El mes d’avientu foi bien templáu n’Asturies, con una temperatura medio de 9,1°, dos graos más de lo habitual nesi mes. Foi’l quintu avientu más calorosu del periodu ente 1961 y 2021.
Categoría: TIEMPU
Estáu del tiempu: Domingu 2 de Xineru
Alborecemos col cielu empuercáu de nubes altes y el fumu de los nunmerosos incendios. La nueche ta siendo mui prieta en munchos conceyos de toa Asturies. L’aire de componente sur que sopla con fuercia nes nueses montañes fae que baxe la humedá abondo, subán les temperatures resecando’l terrén y propagando con facilidá cualesquier llume que se faiga y esto lo lleva faciendo durante munchos díes.
Estáu del tiempu: Vienres 31 d’avientu
Bonos díes, bona xente.
Alborecemos col cielu poco nuboso ya con unes temperatures mui variopintes condicionaes por mor de la iversión térmica orográfica, nes zones deprimies poco ventilaes tan alrodiu de los 4ºC, nes zones al vendestate del vientu sur lleguen a los 16ºC.
Estáu del tiempu: Vienres 24 d’Avientu
Bonos díes, bona xente.
Alborecemos ente nubes ya claros y delles nublines no fonderu los valles con unes temperatures que tan alrodiu de los 8ºC, rexistrándose nel puirtu Payares 3,8ºC.
Güei vamos tener el cielu nuboso con dalguna gotera durante la tarde, les temperatures tenderán a descender llixeramente con dalguna nevada perriba de los 1800m y l’aire ábrigu dirá amenorgando a lu llargu’l día.
Sigue leyendo «Estáu del tiempu: Vienres 24 d’Avientu»
Sigue leyendo «Estáu del tiempu: Vienres 24 d’Avientu»
La selmana viniente va carauterizase pola estabilidá atmosférica
La selmana viniente va carauterizase pola estabilidá atmosférica, gracies al anticiclón que va situase enrriba nuesu, dexándonos escasa nubosidá, sol pero tamién xelaes nuecherniegues.
Sigue leyendo «La selmana viniente va carauterizase pola estabilidá atmosférica»
Estáu del tiempu: Miércoles 8 d’avientu
- Fonte noticia: El Tiempu n’Asturies Facebook
Bonos díes, bona xente.
Alborecemos col cielu cubiertu y xarabatos que son más abondosos na fastera surocidental y na costa con unes temperatures que tan alrodiu de los 6ºC, rexistrándose nel puirtu Payares -3,6ºC onde ta nevando y se fae obligatoriu l’usu de cadenes o neumáticos d’iviernu como na prautica totalidá de los puertos de la metá ocidental d’Asturies, tando pesllaos Lleitariegos y el Connio.
La Lluna va alliniase con Xúpiter, Venus y Saturno nestos díes
La Lluna va tener una alliniación con Xúpiter, Venus y Saturno, a güeyu podrá vese a los planetes destellantes xusto al llau del satélite natural.
Sigue leyendo «La Lluna va alliniase con Xúpiter, Venus y Saturno nestos díes»
En Sotres tan avezaos a nevaes…
Esta estampa de postal perteneciente al día de güei ye d’una de les poblaciones más queseres del conceyu de Cabrales, Sotres. Nos nuesos pueblos d’altu monte, entá tando avezaos a estes nevaes, les xeres cotidianes han d’executase, el ganáu o los quesos, por casu, nun saben de fríu o de calor. El mundu rural a pesar d’estes y otres inclemencies meteorolóxiques nun para. Van Ser unos meses bien duros, pero ende tán ellos, aguantando como siempres. ¡Sois unos héroes!
Estáu del tiempu: sábadu 27 de payares
- Fonte noticia: El Tiempu n’Asturies Facebook
Bonos díes, bona xente.
Presentase’l día pa dar media vuelta y volver pa la cama. Nel cielu tenemos nubosidá abondosa con xarabatos, granizu, muncho vientu y nieve pela cordelera. Les temperatures tan mui condicionaes pol vientu qu’mpide que baxe l’aire fríu y s’asiente, amás como ye de procedencia marina y l’agua del mar ta a 17ºC fae que se recaliente y suban les temperatures nel llitoral y fastera central, mentanto na cordelera nun-yos afeuta y tienen precipitaciones fuertes y persistentes en forma de nieve. Con ello tenemos unos 10ºC na costa y sobre los 5ºC nos valles interiores, rexistrándose nel puirtu Payares -3,2ºC onde nieva intensamente y se fae obligatoriu l’usu de neumáticos d’iviernu o cadenes, tando peslláu pa camiones.
Vienres 26 de payares 2021
ESTÁU DEL TIEMPU Y PREDICIÓN.
Alborecemos col cielu cubiertu y dellos xarabatos intermitentes que son más intensos y persistentes nel interior y cordelera onde nieva copiosamente. Les temperatures tan alrodiu de los 7ºC y nel puirtu Payares rexistren -1,5ºC y se fae obligatoriu l’usu de cadenes o neumáticos d’iviernu, tando peslláu pa camiones.
Estáu del tiempu n’Asturies
Bonos díes, bona xente.
Alborecemos col cielu nuboso y delles nublines no fonderu los valles, tando más escampláu na cordelera con unes temperatures que tan alrodiu de los 8ºC, rexistrándose nel puirtu Payares 1,3ºC.
Imaxe ganadora del certame Weather Photographer of the Year 2021
‘Morning Fog’ – Photo © Giulio Montini
Esti paisaxe surrealista creáu pola borrina matutina ye la imaxe ganadora del certatame Weather Photographer of the Year 2021
Sigue leyendo «Imaxe ganadora del certame Weather Photographer of the Year 2021»
Una nube eléctrica dende 37,000 pies
Asina ye como se ve una nube/tormenta eléctrica dende 37,000 pies
- Tormenta eléctrica: wiki / semeyes /
Yá tenemos nomes para les borrasques d’esti periodu seronda/iverniza…
Visita www.eltiempodejavimo.es
Estáu del tiempu: sábadu 2 d’ochobre
Alborecemos con nubosidá alta entemecida ente dellos claros con unes temperatures que tan alrodiu de los 15ºC, rexistrándos nel puirtu Payares 9,9ºC.
Güei dirá n’aumentu la nubosidá asina como la fuercia del vientu ábrigu que pue soplar con raches mui fuertes nes zones altes de montaña al finar el día. L’aire dirá emburriando nubosidá na vertiente sur de la cordelera y fastera más surocidental d’Asturies, onde puen tener dalguna precipitación. Les temperatures n’ascensu por mor del aire les castañes que mos dexará un ambiente suave y templáu.
Asturies, l’abelugu del calentamientu global na península
¿Podría’l Principáu revertir el so cayente demográficu si’l sur vuélvese «inhabitable» pol calor, a cuanta población podría acoyer, tán preparaes les sos infraestructures?
Sigue leyendo «Asturies, l’abelugu del calentamientu global na península»
Tiempu: Agua n’Asturies
Calor afogadizu nel restu d’España
Cuasi un llitru y mediu d’agua per metru cuadráu recoyóse esta mañana en Colunga que se convirtió nel llugar onde más llovió de toa España. Eso equí. En Jaén, por exemplu, esta madrugada -con unes cais ermes- taben a 35 graos, una temperatura que güei va a superase en dellos puntos d’España.
Asturies, un oasis n’una España que va raspiar los 45 graos
La mayoría de les comunidaes enfréntese a la primer fola de calor del añu. Foto radar AEMET.
Sigue leyendo «Asturies, un oasis n’una España que va raspiar los 45 graos»
Los llares d’Asturies, ente los que más xuben la so temperatura pel branu
Un estudiu revela qu’estos son más susceptibles al impactu de les foles de calor
Sigue leyendo «Los llares d’Asturies, ente los que más xuben la so temperatura pel branu»
Estáu del tiempu: martes 3 d´agostu
- Fonte: El Tiempu n´Asturies
Bonos díes, bona xente.
Alborecemos con nubosidá rota ya con unes temperatures que tan alrodiu de los 15ºC, rexistrándose nel puirtu Payares 9,5ºC.
Güei vamos tener una mañana seliquina con nubes ya claros, amás les temperatures van tender a subir. Pela tarde va dir aumentando la nubosidá cola llegada d’un frente que mos dexará precipitaciones moderaes y xeneralizaes al finar el día cola posibilidá de que tengan calter tormentosu. L’aire sele en xeneral , aumentando al final en zones altes de montaña.
Una “terrible” nube colapsa Uviéu
Eventos astronómicos en xunu…
Lluna llena de marzu 2021
La lluna llena de marzu ye popularmente conocida como la lluna del supergusanu. El nuesu satélite paez aprosimao un 10% más grande de lo habitual. Una definición habitual ye qu’una superluna lo ye si ta a más del 90% d’algamar el so perigeo. La Lluna va entrar en fase de lluna enllena’l domingu, 28 de marzu, a les 20:48 (horariu peninsular español, 19:48 nes Isles Canaries). Va ser la primer lluna llena de la primavera.
Sigue leyendo «Lluna llena de marzu 2021»
Estáu del tiempu: Sábadu 6 de febreru 2021
Bonos díes bona xente.
Alborecemos col cielu cubiertu y precipitaciones persistentes con unes temperatures que tan alrodiu de los 7°C, rexistrándose nel puirtu Payares -0’8°C, onde ta nevando.
Lluna llena de Llobu: 28 de xineru
Lluna Llena de Llobu del 2021
Qué ye la Lluna de Llobu, por qué se llama asina y tolos detalles sobro esti eventu astronómicu de 2021…
El 2021 abrió’l calendariu astronómicu con fuerza. Fai xunas selmanes pudimos apreciar la hipnotizante agua d’estrelles Cuadrántidas, xuna de les más brilloses de too l’añu con 40 meteoros per hora. Pero los eventos astronómicos apenes tán empezando y la Lluna Llena de Llobu… El cielu nocherniegu d’esti 28 de xineru, va allantar a los sos observadores cola Lluna Llena de Llobu del 2021. Conoz qué ye y por qué se-y noma d’esta forma.
Conxelación d´una burbuya na ñeve
Conxelación d’una burbuya na nieve pic.twitter.com/igad4YavxL
Ñeve…
Estáu del tiempu: llunes 4 de xineru
Alborecemos con xarabatos intermitentes que son más intensos y persistentes nos valles del interior, onde nieva copiosamente perriba de los 300m, les temperatures tan al rodiu de 1-2ºC y nel puirtu Payares rexistrán -5ºC, onde se fae l’usu obligatoriu de cadenes o neumáticos d’iviernu. Muncho precuru nel restu de carreteres del interior porque la nieve ta complicando muncho la circulación, hai una montonera puirtos de montaña peslláos d’esta nueche.
Güei tendremos xarabatos frecuentes que van venir acompangáos de truena ya xarazu nel llitoral y van ser de nieve perriba de los 200-300m nel interior, subiendo la cota nes hores centrales del día a los 300-400m. L’aire de componente norte-noroeste sele en xeneral y les temperatures en descensu.
Primer día d´añu Nuevu
La foto/semeya ye de @javicasopress en Ponga donde por primera vez dende la Guerra nun saldrá’l Guirria a facer de les suyes.
Solsticiu d´iviernu n´España
El solsticiu d’iviernu 2020 va tener llugar el próximu 21 d’avientu y con él, dicimos adiós a la seronda para dar la bienvenida a los meses más fríos del añu hasta’l cambéu a la estación primaveral. Mitos del solsticiu d´iviernu.
Estáu del tiempu: domingu 20 d´avientu
Alborecemos col cielu nuboso ya con unes temperatures que tan alrodiu de los 6ºC, rexistrándose nel puirtu Payares 2ºC.
Güei tendremos abondosa nubosidá media-alta pero les precipitaciones nun llegarán hasta la nueche, con unes temperatures que camudarán poco con másimes alrodiu de los 14ºC. Al finar el día va arreciar l’aire ábrigu nes zones altes de montaña onde se puen algamar raches superiores a los 70km/h.
EL NADAL Y FIN D’AÑU SEDRÁN FRÍOS.
Sábadu 19 d’avientu del 2020.
ANALÍS DE LA EVOLUCIÓN ATMOSFÉRICA PA LOS PRÓSIMOS 15 DÍES.
Si seguis otres páxines del tiempu ya inclusu na prensa comercial lleven anunciando dende fae unos díes qu’estes fiestes navidiegues van ser diferentes ya nun solu pola pandemia, a la escontra de lo que paso los últimos años onde esfrutamos de sol y temperatures primaverales, esti añu’l fríu va ser el tema de conversación que se va colar, col o sin el permisu del covid19.
Estáu del tiempu: martes 8 d´avientu
Alborecemos con xarabatos intermitenta frecuentes ya intensos que vienen acompangáos de truena ya xarazu pela costa con unes temperatures que tan alrodiu de los 6ºC y nevando copiosamente perriba de los 700m, rexistrándose nel puirtu Payares -2,7ºC onde se fae obligariu l’usu de cadenes o neumáticos d’iviernu y ta prohibida la circulación al tráficu pesáu.
Güei volveremos a tener un día ivernal, con xarabatos frecuentes, con truena ya xarazu nel llitoral y nevaes copioses pela cordelera con una cota de nieve que tará ente los 700-800m pero con dellos desplomes pola intensidá de la precipitación, nos valles del interior perriba de los 500-600m n’estes primeres hores. L’aire calambrión soplará con fuercia en zones altes ya en puntos del llitorla pero amenorgando a lu llargu del día.
Estáu del tiempu: llunes 7 d´avientu
Alborecemoscol cielu cubiertu y fuerte vientu gallegu que templa l’ambiente con unes temperatures que tan alrodiu de los 11ºC, rexistrándose nel puirtu Payares 1,7ºC, anque ya entamen a descender de nuevu pol ocidente, rexistrándose nel puirtu Lleitariegos 0,6ºC, dempués d’una másima de 3,3ºC.
Güeia partir del mediudía rolará l’aire al calambrión, apurriéndonos xarabatos que vendrán acompangáos de truena ya xarazu nel llitoral durante la tarde, asina como un descensu de les temperatures que fadrá que baxe la cota de nieve de los 1500m a los 700-800m al finar el día. L’aire tamién sedrá protagonista con raches mui fuertes del oeste-noroeste en zones altes ya en puntos del llitoral onde mos dexará mui mala mar.
El prósimu riscar s’intensificarán entovía más les precipitaciones y xarabatos que vendrán acompangáos de truena ya xarazu pela costa con nevaes, copioses na cordelera, perriba de los 700-800m, estendiéndose esta situación durante tol día de mañana, amenorgando dalgo l’aire calambrión anque entovía con raches fuertes en zones altes ya en puntos del llitoral.
Estáu del tiempu: sábadu 5 d´avientu
Alborecemos col cielu cubierto y lloviendo con intensidá, la nieve aparez perriba de los 600m y lo fae copiosamente. Les temperatures tan alrodiu de los 5-6ºC y nel puirtu de Payares rexistrán -3,4ºC, onde se fae obligatoriu l’usu de cadenes o neumáticos d’iviernu como nel restu de los puirtos asturianos, tando peslláos los del Palo, La Marta y el Connio. Nes montañes del ocidente Astur ya superen el mediu metru perriba de los 1000m.
Estáu del tiempu: llunes 30 de payares
Alborecemos con nubosidá alta ya con unes temperatures que tan alrodiu de los 6ºC, rexistrándose nel puirtu Payares 4,3ºC. Güei dirá rolando l’aire al nordés que fadrá que baxen dalgo les temperatures, con nubosidá más abondosa pela mañana, pa dir quedando poco nuboso al atapecer.
Mañana martes alboreceremos con dalguna xelada nes zones más favoretibles, nel cielu tendremos escasa nubosidá pa dir aumentando a lu llargu la mañana ya dexanos el día nuble, amás les temperatures aniciarán un moderáu descensu con aire nordés que pue soplar con dalguna racha moderada en zones altes ya en puntos del llitoral.
Durante’l riscar del miércoles l’aire picará más de norte, apurriéndonos nubosidá baxa abondosa que vendrá acompangada de precipitaciones febles en forma d’orpín, tendiendo a remitir pela mañana, disminuyendo la nubosidá pa quedar escampláu a finar la xornada. Les temperatures mínimes n’ascensu y les másimes en moderáu descensu.
El xueves tará poco nuboso al alborecer con xelaes xeneralizaes nes zones favoretibles, aumentando la nubosidá a lu llargu del día asina como la fuercia del vientu que sedrá gallegu, averándose a los 100km/h al atapecer nes zones altes de montaña ya en puntos del llitoral. Les temperatures camudarán poco o subirán dalgo les másimes.
El vienres camudu radical del tiempu cola llegada d’una masa mui fría ya inestable maritimu-polar que mos apurrirá xarabatos abondosos ya frecuentes, con truena ya xarazu pela costa y nevaes copioses pela cordelera, amás el descensu de les temperatures va ser mui bultable faciendo que surda la nieve tan solu perriba de los 400-500m, too ello acompangáu de fuerte vientu calambrión que fadrá que baxe más la sensación térmica ya tengamos mui mala mar na costa. Esta situación va estendese al sábadu onde continuareos con xarabatos frecuentes y nevaes copioses pela cordelera.
Estáu del tiempu: Llunes 23 de payares
Alborecemos col cielu escampláu ya con unes temperatures que tan alrodiu de los 5ºC, rexistrándose nel puirtu Payares 4,8ºC.
Güei dirá n’aumentu la nubosidá pa dexanos la tarde nuble, con unes temperatures másimes que descenderán llixeramente ya col aire variable y sele.
Mañana martes van abrise dellos claros y subirán dalgo les temperatures con vientu sele ya variable pero con predominiu de la componente sur pela cordelera.
El miércoles la descarga d’aire fríu prevista va cayer pel oceanu, pa formar una borrasca nel surocidente penínsular, quedando nosotros un poco abellugaos n’esta situación, asina y too tendremos precipitaciones frecuentes, un descensu de les temperatures que fadrá que surda la nieve perriba de los 1600m. L’aire seguirá siendo variable ya sele en xeneral.
Estáu del tiempu: sábadu 14 de payares
Alborecemos con escasa nubosidá ya con unes temperatures mui variopintes por mor de les iversiones térmiques ya’l vientu ábrigu. Onde ten al abellgu l’aire les temperatures son baxes, como los 1,8ºC de Perlín nel conceyu d’Uviéu, subiendo hasta los 14,9ºC del cabu Peñes, o los 13,6ºC de la Pola Somiedu, nel puirtu Payares rexistrán 5ºC pelaos.
Güei sábadu tendremos un aumentu de la nubosidá media-alta pero sin llegar a dexanos el día nuble del too, con unes temperatures que camudarán poco calteniéndose suaves, amás l’aire ábrigu va entamar a soplar moderáu en zones altes de la cordelera.
Mañana domingu arreciará l’aire durante’l riscar nes zones altes, onde puen tener raches fuertes que puen algamar los 70km/h. Cola llegada d’un frente altlánticu tendremos el cielu cubierto con precipitaciones de calter moderáu nes hores centrales del día, remitiendo al atapecer. L’aire tenderá a amenorgar y a facese gallegu, refrescando les temperatures a partir del mediudía, dándose les mínimes al final de la xornada.
El llunes disminuirá la nubosidá y abriranse dellos claros a partir del mediudía con unes temperatures más fresques qu’estos díes pero sin pasar fríu con másimes que rondarán los 15ºC.
El martes tará poco nuboso o escampláu con un descensu de les temperatures mínimes pero templando abondo’l día pela tarde con másimes que se van averar a los 20ºC.
Y paez qu‘a partir del miércoles podremos tener una entrada efímera de vientu calambrión ( NW ) que mos dexará un descensu de les temperatures y dalguna precipitación feble pero esto ya lu diremos viendo.
Estáu del tiempu: Domingu 8 de payares
Alborecemos con intervalos nubosos ente dellos claros, siendo la nubosidá más abondosa nel ocidente onde inclusu tienen dalguna precipitación. Les temperatures tan alrodiu de los 14ºC y nel puirtu Payares soplá con fuercia l’aire ábrigu con 6,1ºC.
Güei pela mañana tendremos predominiu del cielu nuboso entemecido ente claros cola posibilidá de que caiga dalguna gotera dispersa ya ocasional que sedrá más probable nel ocidente. Pela tarde tenderá a escamplar y les temperatures camudarán poco, calteniéndose suaves. L’aire de componente sur soplará con fuercia en zones altes de montaña, onde puen tener raches fuertes que puen algamar los 70km/h.
Mañana llunes tendremos el día nuble ya perderá fuelle l’aire, quedando sele ya variable, durante’l día dirán desendolcándose les nubes, pa dexanos xarabatos de calter tormentosu pela tarde, con unes temperatures que descenderán llixeramente les másimes por mor del cielu nuble ya sedrán mui suaves les mínimes.
El restu la selmana van alternar los díes más escamplaos con dellos más nubosos pero sin malpenes precipitaciones y siempre coles temperatures mui suaves.
Estáu del tiempu Xueves 5 de payares
Bonos díes, bona xente.
Alborecemos con nubes ya claros y con unes temperatures que ta alrodiu de los 6ºC nel interior y de los 10ºC pela costa onde sopla fuerte’l norés, rexistrándose nel puirtu Payares 3,6ºC.
Güei tendremos nubes ya claros con nubosidá más abondosa pela tarde, l’aire del nordés va soplar con raches fuertes nel llitoral ,dexando un día desapacible, mientres na cordelera entamará a soplar de componente sur faciendo que medren perellí les temperatures, nel restu l’ascensu sedrá más llixeru.
Mañana vienres tendremos nubosidá abondosa pero sin malpenes precipitaciones, salvo na fastera más surocidental y cara sur de la cordelera onde lloverá durante tol día, nel restu pue escapase dalguna gotera ocasinal ya dispersa que sedrán más probables al finar el día. Les temperatures n’ascensu bultable, algamándose los 20ºC na mayor parte d’Asturies ya’l vientu ábrigu con raches fuertes en zones altes de montaña.
El sábadu van abrise dellos claros, sobre too na fastera centru-oriental, tando más nuble nel surocidente ya cordelera, yá pela tarde podemos tener dalgún xarabatu de calter tormentosu, más probables ya intensos nel interior ya zones montañoses. L’aire seguirá siendo ábrigo con unes temperatures másimes que descenderán llixeramente, mentantu que les mínimes van caltenese mui suaves.
El domingu tendremos intervalos nubosos entemecios ente dellos claros con dalgún xarabatu dispersu de calter tormentosu que sedrán más frecuentes y abondosos pela cordelera y fastera surocidental onde va soplar l’ábrigu con raches fuertes. Les temperatures seguirán calteniéndose suaves.
Estáu del tiempu: Domingu 25 d´ochobre
Bonos díes, bona xente.
Alborecemos col cielu nuboso y delles precipitaciones, con unes temperatures que tan alrodiu de los 12ºC, rexistrándose nel puirtu Payares 7,2ºC. La parte más activa del frente ya nos cruzo , dexando al so pasu más de 25 l/m2 en munches zones d’Asturies.
Güei una vegada col pasu’l frente fríu, vamos tener intervalos nubosos que puen dexar xarabatos dispersos a lu llargu’l día que sedrán más abondosos ya frecuentes pela mañana, sobre too pela costa. Les temperatures descenderán, más bultablemente pela tarde, dándose les mínimes al finar el día. La cota de nieve anicialmente tará mui alta pero dirá baxando col trascursu les hores hasta quedar, al atapecer, sobre los 1300m, pero yá sin malpenes precipitaciones. L’aire seguira soplando con fuercia nes zones altes de montaña ya en puntos del llitoral.
Mañana llunes alboreceremos con grandes claros ya ente’l borrín y la nublina no fonderu los valles, a partir del mediudía dirá aumentando la nubosidá ,pa quedar el cielu nuble pela tarde cuando pue daxe dalgún xarabatu feble ya dispersu que sedrá de nieve perriba de los 1600m. L’aire seguirá soplando gallegu con raches fuertes en zones altes ya en puntos del llitoral con unes temperatures que descenderán les mínimes ya se caltendrán les másimes.
Los prósimos díes seguiremos con airón pero sedrá gallegu-baxu que calecerá l’ambiente ya solu dexará lluvies d’importancia na fastera más surocidental d’Asturies, pa a partir del xueves escamplar del too, perder fuelle l’aire ya subir les temperatures que mos dexarán un ambiente mui sele ya inclusu calurosu.
Una lluna llena azul va allumar el cielu mientres la nueche de Samaín (Halloween)
El 31 d’ochobre va celebrase, como cada añu, la nueche de Halloween. Ye una xornada que, dende fai yá unos cuantos años, ta cada vez más estendida per Europa. El nuesu país nun ye una esceición. Va Ser una nueche entá más especial que n’otres ocasiones: va tener llugar la segunda lluna llena n’un mesmu mes: una lluna azul. La lluna llena nun ye habitual en Halloween
Irónicamente, la imaxe de la lluna llena nel cielu, mientres una nueche de Halloween, ye una imaxe bien popular n’ensame de medios. Tantu en series y películes, como en videoxuegos, cómics… Sicasí, ye pocu frecuente que la lluna tea en fase de lluna llena nesa xornada. La lluna tardienta 29,5 díes en completar el so ciclu de fases. Asina que, aprosimao, cada 30 díes tenemos una lluna llena. Esto provoca que la única posibilidá de tener una lluna llena en Halloween prodúzase cuando tamién tenemos una lluna azul.
Sigue leyendo «Una lluna llena azul va allumar el cielu mientres la nueche de Samaín (Halloween)»
Estáu del tiempu: Xueves 22 d´ochobre
ESTÁU DEL TIEMPU Y PREDICIÓN según El tiempu n´Asturies
Bonos díes, bona xente.
Alborecemos col cielu cubiertu pol borrín y la nublina con unes temperatures que tan alrodiu de los 11ºC, rexistrándose nel puirtu Payares 5,9ºC.
Güei tendremos un día mui asemeyáu al d’ayeri, con intervalos nubosos entemecidos ente dellos claros pela mañana, con nubosidá de desendolque a partir del mediudía que mos pue dexar dalgún xarabatu dispersu pela tarde, más probables nel interior d’Asturies, con unes temperatures que camudarán poco ya col aire ábrigu sele en xeneral.
Mañana vienres la entrada de vientu gallegu va facer que resfresquen les temperatures, nel cielu seguiremos con nubes ya claros, sicasí con menor nubosidá que güei y de menor desendolque polo que los xarabatos de pela tarde sedrán ocalionales, febles ya dispersos.
El sábadu sedrá’l meyor día de la selmana, col cielu escampláu y temperatures n’ascensu, anque al atapecer vamos tener un aumentu de la nubosidá media-alta, amás al finar el día entamará a soplar con fuercia l’aire nes zones altes de montaña.
Nel alborecer del domingu va cruzanos un frente fríu empobináu por una vaguada atlántica, al so pasu va dexanos precipitaciones abondoses ya un descensu nes temperatures, amás l’aire gallegu va soplar con mucha fuercia nes zones altes ya en puntos del llitoral. A partir del mediudía dirá llimpiándose’l cielu pa quedar con intervalos nubosos entemecios ente dellos claros, cola posibilidá de que caiga dalguna gotera o xarabatín feble ya dispersu, más probables nel llitoral. La nieve anicialmente tará nes cumes más altes de la cordelera, baxando nel trascursu’l día hasta los 1300m pero ya sin malpenes precipitaciones.
Durante’l riscar y la mañana del llunes l’aire gallegu tenderá a rolar al calambrión, faciendo que entren los xarabatos del mar tierra a dientru, con nevaes pela cordelera perriba de los 1200m, subiendo durante’l día hasta finar perriba de los 1600m, pero esto ya lu diremos viendo.
DOMINGU 18 D’OCHOBRE DEL 2020
Bonos díes, bona xente. YE TIEMPU DE CASTAÑES YA SIDRE DEL DUERNU. Bienveníos al Tiempu n’Asturies collacies ya collacios, n’esta páxina vos convidamos a conocer xuntos, la maxia de la meteoroloxía n’Asturies, onde’l borrín y la nublina difuminen un horizonte siempre inciertu ya interesante.
Alborecemos col cielu empuercáu de nubosidá alta con unes temperatures que tan alrodiu de los 9ºC, rexistrándose nel puirtu Payares 7,5ºC.
Güei otru día seliquino que vamos tener, con nubes altes entemecides ente dellos claros, peronde van colase los rayinos de sol , caleciendo abondo l’ambiente al mediudía, con unes temperatures másimes que van superar los 20ºC na mayor parte d’Asturies, amás l’aire seguirá siendo feble ya variable con predominiu de la componente sur.
Mañana llunes va a entamar a entranos aire ábrigu, coyendo fuelle a lu llargu’l día con raches mui fuertes en zones altes de la cordelera durante la tarde. Esti aire va empobinanos nubosidá media-alta que sedrá más abondosa nel surocidente asturianu ya cordelera, onde tendrán precipitaciones, nel resto quedaremos al abellugu del «muru» dexándonos la nubosidá más rota y faciendo l’efeutu foenh al pasu per ésti, con unes temperatures másimes que superarán ampliamente los 20ºC.
El martes les baxes presiones nel noroeste facilitarán el pasu d’un potente frente altlánticu que regará abondosamente la península d’oeste a este, siendo les precipitaciones más abondoses en Castiella ya’n cara sur de la cordelera, asina y too n’Asturies esta vegada tamién tendremos lluvies abondoses durante tol martes, con un descensu de les temperatures másimes pero con un ascensu de les mínimes que van dexanos un ambiente suave pero húmedu. L’aire perdera fuelle quedando sele ya variable con dalguna racha moderada en zones altes de montaña.
El Tiempu n´Asturies
SÁBADU 29 D’AGOSTU DEL 2020, ESTÁU DEL TIEMPU Y PREDICIÓN.
Fonte: El Tiempu n´Asturies
Fonte: El Tiempu n´Asturies
Bonos díes, bona xente.
Alborecemos col cielu cubiertu y dellos xarabatos intermitentes, con unes temperatures más propies de la seronda, alrodiu los 15ºC pela costa, de los 12ºC nel interior y los 5ºC pelos puirtos.
Güei l’aire del norte, ta emburriándonos una masa d’aire mui fría ya inestable, procedente de llatitues septentrionales que fadrá baxar bultablemente les temperatures y al pasu pel Cantábricu va dir cargándose d’humedá, topándose cola cordelera, pa dexanos xarabatos frecuentes ya intensos nes zones favoretibles que puen venir acompangáos de tronios a partir del mediudía. El descensu de les temperatures provocará que surda la nieve nes cumes más altes de Picos d’Europa y les Ubiñes, sobre too na prósima nueche.
Durante’l riscar del domingu seguirán les precipitaciones, anque con tendencia a dir remitiendo en frecuencia ya intensidá, y ya pol día dirá meyorando d’oeste a este, calteniéndose cierta inestabilidá nel oriente asturianu. Les temperatures másimes medrarán llixeramente y l’ambiente seguirá siendo serondín, a pesar de los rayinos de sol que van colase pelos claros, caleciéndonos seliquinamente.
Estáu del Tiempu n´Asturies
MARTES 25 D’AGOSTU DEL 2020, ESTÁU DEL TIEMPU Y PREDICIÓN.
Bonos díes, bona xente.
Alborecemos col cielu escampláu y con unes temperatures que tan alrodiu de los 17ºC.
Güei tendremos un día poco nuboso y soleyeru , aumentando la nubosidá al atapecer na fastera norte d’Asturies cola posibilidá de dalgo d’orpín al finar el día nes zones más favoretibles, quedando escampláu nes zones altes de la cordelera y dellos valles del surocidente. Les temperatures n’ascensu y l’aire variable y sele en xeneral con dalgo de nordés pela costa.
Mañana miércoles alboreceremos con nobosidá baxa na fastera central asturiana, tando escampláu na cordelera y dellos valles del surocidente. Pali que pali dirán dixebrándose los estratos y abriéndose dellos claros, con unes temperatures que malpenes camudarán o descenderán llixeramente les másimes y subirán les mínimes. L’aire seguirá siendo variable y sele en xeneral con dalgo de nordés pela costa.
El xueves tendremos escasa nubosidá pela mañana, ellí onde nun se presenten los borrinos y nublines del alborecer que tenderán a dixebrase rápidamente. Ya pela tarde tendremos un aumentu de la nubosidá que mos dexará’l día nuble ya inclusu dalgún xarabatu de calter tormentosu na fastera más suroriental d’Asturies, con unes temperatures que camudarán poco, calteniéndose mui suaves.
Eclises de sol y lluna para esti branu
El próximu 5 de xunetu va haber un eclís de Lluna visible dende España y podrán reparase les Perseidas, l’agua de meteoros más importante del añu.
El branu de 2020 entama´l sábadu 20 de xunu a les 23.44 hores y va tener una duración de 93 díes y 15 hores, rematando’l 22 de setiembre col empiezu de la seronda, según cálculos del Observatoriu Astronómicu Nacional (OAN) del Institutu Xeográficu Nacional (IGN).