Publicado en Asociaciones

Naz l’Asociación del Doblaxe d’Asturies

El coleutivu de dobladores del país ta acabante d’axuntase na Asociación del Doblaxe d’Asturies (ADOAS). Humberto Gonzali salió escoyíu primer presidente d’un coleutivu que tien ente los sos oxetivos dignificar el sector y ameyorar les condiciones de los trabayadores, y la difusión y normalización de la llingua asturiana.

La creación d’ADOAS vien pola necesidá de la esistencia “de una entidá específica que representara” a los emplegaos del doblaxe n’Asturies, “sían de la rama artística como de la rama téunica”. Asina, ésta va tener ente los sos fines “la defensa y ameyoramientu de l’actividá de los direutores, ayudantes de direición, axustadores y actores y actrices de doblaxe, y tamién la de los trabayadores téunicos nesta estaya llaboral”, amás de “promover al seutor na sociedá y ante les alministraciones, y potenciar la so rellación colos medios de comunicación y otres instituciones del mediu”.

Ún de los campos nos que va enfotase l’asociación pa les sos aiciones “sedrá lo venceyao a la relevancia del doblaxe na difusión y normalización de la llingua asturiana”, añaden. La Xunta Direutiva d’ADOAS, integrada por presidente, secretariu, ayalgueru y ocho vocales, formóse ayeri nun actu en Xixón pa un periodu de 3 años.

Nel actu salió escoyíu como primer presidente Gonzali, promotor cultural, traductor, axustador y profesor de Historia del Doblaxe, amás d’escritor. Tien traducío y axustao’l versionáu d’una trentena de llargumetraxes y punxo-y voz a numberosos personaxes en doblaxes fechos por Gonzali Producciones y Wadjet Media.

Autor:

Maestra de Llingua Asturiana Colexu Carmen Ruiz-Tilve - Uviéu